لبنانی مزاحمتی تنظیم حزب اللّٰہ کا کہنا ہے کہ وہ اسرائیل کو پیچھے دھکیل سکتی ہے۔ اس کے پاس کافی وسائل موجود ہیں۔

حزب اللّٰہ کے میڈیا آفس کے سربراہ محمد عفیف کا کہنا ہے کہ ان کی جماعت کے پاس اسرائیل کو پیچھے دھکیلنے کےلیے کافی جنگجو، ہتھیار اور گولہ بارود موجود ہیں۔

انہوں نے جنوبی لبنان کے اس علاقے میں صحافیوں سے بات کی جو اسرائیلی حملوں کا نشانہ بنا تھا۔

محمد عفیف نے کہا، ’ہم دشمن کو باور کروانا چاہتے ہیں کہ یہ صرف پہلا مرحلہ ہے، خدا کے فضل سے اپنے وطن کے لیے خون اور جان کا نذرانہ پیش کرنے کے لیے تیار ہیں۔‘

انکا کہنا تھا کہ جو کچھ مرون الراس اور دیگر علاقوں جیسے عودیسہ میں ہوا ہے، وہ صرف ایک معمولی کارروائی ہے۔

انہوں نے یہ بھی کہا کہ اسرائیل کی فضائی برتری ’زمین پر نقصان میں بدل جائے گی۔‘

حزب اللّٰہ کا یہ بیان اسرائیل اور لبنان کے درمیان جاری کشیدگی کے پس منظر میں سامنے آیا ہے۔