خیبرپختونخوا میں سکیورٹی فورسز اور دہشتگرد گروہ فتنہ الخواج کے درمیان فائرنگ کے تبادلے میں 3 اہلکار شہید اور 3 دہشتگرد مارے گئے۔ سکیورٹی ذرائع کے مطابق پولیس، ایلیٹ فورس اور سی ٹی ڈی، خیبرپختونخوا کی مشترکہ کارروائی کبل گرام کے دشوار گزار پہاڑی علاقوں میں کی گئی، جہاں مارے گئے دہشتگرد انتہائی مطلوب تھے۔ ذرائع کے مطابق ہلاک دہشتگرد نور اسلام فتنہ الخوارج کا سرغنہ تھا، جس کی سر کی قیمت 50 لاکھ روپے مقرر تھی۔ کارروائی کے دوران ایک دہشتگرد نے گرفتاری سے بچنے کے لیے خود کو دھماکے سے اڑا لیا۔ شدید فائرنگ کے تبادلے میں پولیس کے شہید ہونے والے اہلکاروں میں مقبول احمد، فدا حسین، اور سعید الرحمان شامل ہیں۔ سکیورٹی حکام کا کہنا ہے کہ یہ کارروائی دہشتگردی کے خاتمے اور عوامی تحفظ کے لیے ایک اہم کامیابی ہے۔