جیٹ فیول کی قیمتوں میں غیر معمولی اضافے کے بعد فضائی سفر مزید مہنگا ہو گیا ہے، جس کے باعث ایئرلائن ٹکٹس کی قیمتوں میں نمایاں اضافہ دیکھنے میں آ رہا ہے اور مسافروں پر اضافی مالی بوجھ پڑنے لگا ہے۔جیٹ فیول کی قیمت 176 روپے فی لیٹر سے بڑھ کر 417 روپے فی لیٹر تک پہنچ گئی ہے، جس کے بعد ایئرلائنز نے کرایوں میں فیول سرچارج کی مد میں 10 سے 100 ڈالر تک اضافہ کر دیا ہے۔ اس اضافے کے نتیجے میں فضائی سفر عام مسافروں کے لیے مزید مہنگا ہوتا جا رہا ہے۔ قیمتوں میں اضافے کا براہِ راست اثر مسافروں پر منتقل کیا جا رہا ہے، جبکہ ایئرلائنز نے عندیہ دیا ہے کہ مجموعی کرایوں میں 100 فیصد تک اضافہ ممکن ہے۔ بعض ذرائع کے مطابق جیٹ فیول کی قیمت میں 34 فیصد سے زائد جبکہ کچھ ایئرلائنز کے مطابق 70 فیصد تک اضافہ ریکارڈ کیا گیا ہے۔قومی ایئرلائن پاکستان انٹرنیشنل ایئرلائنز نے مقامی پروازوں پر 10 ڈالر، کینیڈا روٹس پر 100 ڈالر، برطانیہ کے لیے 75 ڈالر جبکہ سعودی عرب اور خلیجی ممالک کے لیے 50 ڈالر تک اضافی فیول سرچارج عائد کر دیا ہے۔ دوسری جانب نجی ایئرلائنز نے بھی 15 سے 150 ڈالر تک اضافی چارجز نافذ کر دیے ہیں۔ ایئرلائن حکام کا کہنا ہے کہ خلیجی فضائی حدود کی بندش اور عالمی سطح پر ایندھن کی قیمتوں میں اضافے کے باعث کرایوں میں یہ اضافہ ناگزیر ہو گیا ہے، جبکہ بنیادی کرایہ برقرار رکھنے کے باوجود فیول ایڈجسٹمنٹ کے ذریعے مجموعی ٹکٹ مہنگے ہو گئے ہیں۔