امریکی صدر ڈونلڈ ٹرمپ نے ایک بیان میں سعودی عرب اور خلیجی ممالک کا شکریہ ادا کرتے ہوئے نیٹو پر تنقید کی ہے۔ انہوں نے کہا کہ وہ سعودی عرب کی پوری مملکت کے شکر گزار ہیں جو اس صورتحال میں انتہائی مددگار ثابت ہوئی، جبکہ نیٹو اس کے برعکس رہا۔ ٹرمپ نے مزید کہا کہ سعودی عرب، قطر، متحدہ عرب امارات، بحرین اور حتیٰ کہ کویت نے بھی جنگ میں کردار ادا کیا۔ کویت نے تو "بہترین میزائلوں" کے ذریعے تین امریکی طیاروں کو بھی مار گرایا۔ امریکی صدر ڈونلڈ ٹرمپ نے ایران جنگ کے تناظر میں نیٹو پر سخت تنقید کرتے ہوئے کہا ہے کہ اس اتحاد نے امریکہ کی کوئی مدد نہیں کی، اس لیے واشنگٹن اس میں رہنے کا پابند نہیں۔ انہوں نے کہا کہ نیٹو کی سب سے بڑی غلطی یہ تھی کہ وہ اس اہم موقع پر موجود ہی نہیں تھا۔ ٹرمپ نے عندیہ دیا کہ امریکہ نیٹو سے علیحدگی اختیار کر سکتا ہے، جس سے ملک کو بڑے پیمانے پر مالی بچت ہوگی کیونکہ امریکہ ہر سال نیٹو پر اربوں ڈالر خرچ کرتا ہے۔ ان کا کہنا تھا کہ امریکہ ہمیشہ نیٹو کی حمایت کے لیے تیار رہا، لیکن موجودہ صورتحال میں واشنگٹن کو وہاں موجود رہنے کی ضرورت محسوس نہیں ہو رہی۔ انہوں نے سوال اٹھایا کہ "ہم کیوں وہاں رہیں جب وہ ہمارے لیے موجود نہیں؟"