این ای او سی نے 18 سے 23 اپریل کے دوران ملک کے مختلف حصوں میں موسمی صورتحال کے حوالے سے الرٹ جاری کر دیا ہے۔ رپورٹ کے مطابق بالائی اور وسطی پنجاب میں 18 اور 19 اپریل کو گرج چمک، آندھی اور طوفان کے ساتھ بارش جبکہ چند مقامات پر ژالہ باری کا امکان ہے۔ اسلام آباد، راولپنڈی، اٹک، چکوال، جہلم، میانوالی، سرگودھا، گجرات، گوجرانوالہ، فیصل آباد، لاہور اور ڈیرہ غازی خان میں تیز ہواؤں کے ساتھ بارش متوقع ہے۔جنوبی پنجاب میں زیادہ تر موسم خشک رہے گا تاہم چند علاقوں میں 18، 19 اور 23 اپریل کو ہلکی بارش ہو سکتی ہے۔ بلوچستان کے شمالی اور مغربی اضلاع میں بھی 18، 19، 22 اور 23 اپریل کو گرج چمک اور آندھی کے ساتھ بارش کی پیشگوئی کی گئی ہے جبکہ ساحلی علاقوں میں تیز ہواؤں کے ساتھ ہلکی بارش کا امکان ہے۔ سندھ کے مختلف علاقوں میں 19 اور 20 اپریل کو آندھی اور گرج چمک کے ساتھ بارش متوقع ہے جبکہ کئی اضلاع میں درجہ حرارت معمول سے زیادہ رہنے کا امکان ظاہر کیا گیا ہے۔ خیبرپختونخوا کے بیشتر اضلاع میں بارش اور آندھی کی پیشگوئی کی گئی ہے جبکہ بالائی علاقوں میں بعض مقامات پر برفباری بھی ہو سکتی ہے۔گلگت بلتستان اور آزاد کشمیر میں 18، 19، 22 اور 23 اپریل کو تیز ہواؤں اور موسلا دھار بارش کا امکان ہے جس کے باعث لینڈ سلائیڈنگ کا خطرہ بڑھ سکتا ہے۔ حکام نے خبردار کیا ہے کہ آسمانی بجلی، ژالہ باری اور تیز ہوائیں کمزور تعمیرات اور بجلی کی تنصیبات کو نقصان پہنچا سکتی ہیں جبکہ سڑکیں پھسلن کا شکار ہو سکتی ہیں۔