امریکا کی سابق نائب صدر کملا ہیرس نے کہا ہے کہ اسرائیلی وزیر اعظم بنیامین نیتن یاہو نے صدر ڈونلڈ ٹرمپ کو ایران کے ساتھ جنگ کی طرف دھکیلا۔ ان کا کہنا تھا کہ یہ جنگ امریکی عوام کی خواہش کے برعکس تھی اور اس میں امریکا کو غیر ضروری طور پر شامل کیا گیا۔اپنے بیان میں کملا ہیرس نے کہا کہ اس فیصلے کے باعث امریکی فوجیوں کی جانیں خطرے میں پڑ گئیں اور خطے میں کشیدگی میں مزید اضافہ ہوا۔ انہوں نے کہا کہ ایسی جنگوں میں شمولیت سے گریز کیا جانا چاہیے جو براہ راست قومی مفاد سے مطابقت نہ رکھتی ہوں۔ کملا ہیرس کے مطابق ایران کے خلاف کارروائی کا فیصلہ عوامی امنگوں کے خلاف تھا اور اس کے اثرات عالمی سطح پر محسوس کیے جا رہے ہیں۔ انہوں نے سفارتی حل پر زور دیتے ہوئے کہا کہ تنازعات کو مذاکرات کے ذریعے حل کرنا زیادہ مؤثر راستہ ہے۔ایران اور امریکا کے درمیان حالیہ کشیدگی کے باعث عالمی سطح پر تشویش پائی جا رہی ہے جبکہ دونوں ممالک کے درمیان پندرہ روزہ جنگ بندی کے اختتام میں صرف چند دن باقی رہ گئے ہیں۔